Кніга «Лёсы» прысвечаная жыццю і дзейнасці людзей найноўшай гісторыі Беларусі.

22 кастрычніка ў сядзібе партыі БНФ адбудзецца прэзентацыя кнігі журналіста Аляксандра Тамковіча «Лёсы», перадае «Радыё Свабода».

«Лёсы» Аляксандра Тамковіча — гэта 50 інтэрв'ю-маналогаў з вядомымі дзеячамі беларускага адраджэння: палітыкамі, грамадзкімі і творчымі дзеячамі. Кніга пісалася пяць гадоў і выдавалася ў меншым аб'ёме, цяпер жа выйшаў дапоўнены варыянт. Пра асноўную ідэю кнігі кажа аўтар «Лёсаў» Аляксандр Тамковіч:

«На гэты конт вельмі слушна выказаўся Манаеў. Ён сказаў, што калі прачытаць гэтую кнігу, становіцца зразумелым, чаму згубілі шанцы, якія былі. Бо ўсе гэтыя людзі — культурная, творчая і палітычная эліта нацыі», - кажа аўтар кнігі.

Сярод герояў кнігі Аляксандра Тамковіча — паэт Рыгор Барадулін, пісьменнік Уладзімір Арлоў, кінарэжысёр Юры Хашчавацкі, а таксама шмат хто іншы. Гаворка вядзецца не толькі пра іх грамадскую і творчую дзейнасць, але і пра асабістае жыццё.

Праваабаронца Алесь Бяляцкі — таксама адзін з герояў кнігі:

«У Аляксандра была такая журналісцкая пазіцыя — паказаць людзей не толькі як грамадскіх ці дзяржаўных дзеячаў, але і ў сувязі з рознымі жыццёвымі момантамі — маленствам, юнацтвам, навучаннем і г.д. І гэта атрымалася дастаткова цікава», - падкрэсліў праваабаронца.

Іншы герой кнігі Аляксандра Тамковіча, дэпутат Вярхоўнага савета 12-га склікання, кіраўнік Таварыства беларускай мовы Алег Трусаў назваў «Лёсы» летапісам найноўшай гісторыі:

«Я лічу, што гэта вельмі добры падручнік па найноўшай гісторыі Беларусі. Бо гісторыю варта пісаць тады, калі асноўныя дзеячы яшчэ жывыя. Таму я назваў бы Тамковіча летапісцам найноўшай гісторыі. Ну, і я думаю, што тым, хто будзе пісаць гадоў праз сто нашую гісторыю, гэтая кніга будзе вельмі добрым дапаможнікам», - упэўнены Алег Трусаў.

Аляксандр Тамковіч паведаміў, што распачаў працу над новымі інтэрв'ю-маналогамі, якія увойдуць у наступную кнігу «Лёсы».